വരി വളയാതെ എഴുതി പഠിക്കാന്‍ നാല് വര , രണ്ടു വര കോപ്പി ഉണ്ടായിരുന്നു അന്ന്
പഠിക്കുന്ന കാലത്ത് . വരി വിട്ടു അക്ഷരങ്ങള്‍ ഒന്ന് ഇറങ്ങുകയോ കേറുകയോ ചെയ്താല്‍ അവയ്ക്ക് കീഴെ ടീച്ചര്‍ ചെമന്ന മഷി കൊണ്ട് രണ്ടു വര വരക്കും . ഒടുക്കം പേജിനു കുറുകെ നല്ല വലുപ്പത്തില്‍ ഒരു ശരിയും തരും . ചുവന്ന ശരികള്‍ കാണുന്നതോടെ മുഖം പ്രകാശിക്കും
കൂടെ , ഗുഡ് എന്നോ വെരി ഗുഡ് എന്നോ കിട്ടിയാല്‍ അന്ന് 'ബല്യ 'പെരുന്നാള്‍ !!
കണക്ക് , സയന്‍ സ് നോട്ടു ബുക്കുകള്‍ വരയില്ലാത്തത് ആയിരിക്കണം .
കുറെ ചിത്രങ്ങളൊക്കെ വരക്കാനുണ്ടാകും . അതുകൊണ്ട്
വരകളുള്ള ബുക്ക് പറ്റില്ല . വരയില്ലാത്ത ബുക്കിലൂടെ വളയാതെ എഴുതുന്നത്‌ വലിയ ബുദ്ധിമുട്ടുള്ള കാര്യം തന്നെയായിരുന്നു .
പിന്നെയാണ് വരയില്ലാത്ത നോട്ടു ബുക്കില്‍ എഴുതാന്‍
ഒരു സൂത്രം കിട്ടിയത് . എന്റെ കൂട്ടുകാരന്‍ വിജയനാണ്
ആ തന്ത്രം പറഞ്ഞു തന്നത് . വിജയന് അവന്റെ ചേച്ചി പറഞ്ഞു കൊടുത്തതാണ് .
സൂത്രം ഇതാണ് . നല്ല കട്ടിയില്‍ പേനകൊണ്ട് കടുപ്പിച്ചു വരച്ച ഒരു പേജ് വരയില്ലാത്ത പേജിന്റെ അടിയില്‍ വെക്കുക . മുകളിലെ പേജിലെഴുതുമ്പോള്‍ താഴെയുള്ള പേജിലെ വരകള്‍ കൃത്യമായി നിഴലിക്കും . അതിന്റെ മീതെ കൂടി എഴുതി ശീലിച്ചു വളയാതെ .
പിന്നെപ്പിന്നെ വരയില്ലാത്ത പേജിലും തീരെ വളയാതെ എഴുതാം എന്നായി .
എന്തിനായിരുന്നു അന്ന് അങ്ങനെ കോപ്പി എഴുതി പഠിച്ചത് എന്ന് ഇന്നും ഞാനാലോചിക്കാറുണ്ട് . ഇക്കാലത്ത് പേപ്പറോ , പേനയോ , മഷിയോ ,
ഒന്നും ഇല്ലാതെ എഴുതുമ്പോള്‍ , ആര് എഴുതിയാലും ഒരേപോലെ യുള്ള അക്ഷരങ്ങള്‍ ആയി മാറുമ്പോള്‍ പ്രത്യേകിച്ചും .
പിന്നെയാണ് എഴുത്ത് മാത്രമല്ല ജീവിതവും അങ്ങനെയാണെന്ന്
വായിച്ചെടുത്തത് .
ജീവിതമെന്ന ബുക്കിലെ വരയില്ലാത്ത കടലാസ്സിലൂടെ തെറ്റാതെ വളയാതെ എഴുതി പോകാനുള്ള ഒരു പാഠം കൂടി ആയിരുന്നു അത് എന്ന് പിന്നീടാണ് മനസ്സിലാവുന്നത്
ജീവിതം എന്ന ബുക്കിലെ എഴുത്തും , അതിലെ അക്ഷരങ്ങളും തെറ്റിപ്പോവുകയോ വളഞ്ഞു പോവുകയോ ചെയ്യല്ലേ എന്ന ഒരു പ്രാര്‍ത്ഥനയേ ഉണ്ടായിരുന്നുള്ളൂ . അന്നും ഇന്നും . ലൈന്‍ തെറ്റാതെ വളയാതെ കേറിയോ ഇറങ്ങിയോ ആവാതെ മന:സാക്ഷിയുടെ ചെമന്ന മഷി കൊണ്ട് ശരിയും ഗുഡ് എന്നോ വെരി ഗുഡ് എന്നോ ഉള്ള 'അഭിനന്ദനവും ' കിട്ടി മുന്നോട്ടു പോകണം എന്ന ആഗ്രഹവും .
സത്യത്തില്‍ ജീവിതത്തില്‍ ഒരു പാട് 'ലൈനുകള്‍' കടന്നാണ് നാം കടന്നു പോകുന്നത് .
ആദ്യം കോപ്പി ബുക്കിലെ ലൈന്‍
പിന്നെ അസംബ്ലിയില്‍ നില്‍ക്കുമ്പോഴുള്ള ലൈന്‍
വീട്ടിനു അകത്തേക്ക് കറന്റ് എത്തിക്കുന്ന ലൈന്‍
പിന്നെ അവളോടുള്ള ലൈന്‍ !!!
മാവേലി സ്റ്റോറിനു മുമ്പില്‍
ആശുപത്രിക്ക് മുമ്പില്‍,
കുടി വെള്ളത്തിന് ,
മറ്റേ 'വെള്ളം കുടിക്ക്‌ '
സിനിമാ ടിക്കറ്റിന്
യാത്രാ ടിക്കറ്റിന് ...
ചുരുക്കത്തില്‍ ലൈനില്ലാത്ത ജീവിതം ഇല്ല . ഒരു ലൈനിലൂടെയും കടന്നു പോകാത്ത ഒരു മനുഷ്യനും ഇല്ല . നമ്മുടെ ജീവിതം അറിഞ്ഞോ അറിയാതെയോ ലൈനുമായി ബന്ധിപ്പിക്കപ്പെട്ടിരിക്കുന്നു .
ഇപ്പോഴിതാ ഈ ലൈനുകളെ കുറിച്ച് ഇങ്ങനെയൊക്കെ ഓര്‍ക്കാനും പറയാനും പങ്കു വെക്കാനും നാം ഉപയോഗിക്കുന്നതും മറ്റൊരു ലൈന്‍ തന്നെ . ടൈം ലൈന്‍ !!!
OO
പോസ്റ്റുകള്
0 comments:
ഒരു അഭിപ്രായം പോസ്റ്റ് ചെയ്യൂ