അവധി

അവധികളങ്ങനെ  കഴിഞ്ഞു പോകുന്നു 
അടുത്ത അവധിക്കായി കാത്തു കാത്തിരിക്കുന്നു 
ഉപയോഗിക്കുന്ന പല വസ്തുക്കളുടെയും കാലാവധി തീരുന്നു 
കലാവധി കൂടുതലുള്ള വസ്തുക്കള്‍ തന്നെ തെരഞ്ഞെടുക്കുന്നു 
അടുത്ത അവധിക്കായ്‌ ഇപ്പോള്‍ തന്നെ സ്വപ്നം കണ്ടു 
തുടങ്ങുന്നു 

ഓരോ തിരിച്ചു വരവും അടുത്ത റീ എന്ട്രിയുടെ സ്വപ്നങ്ങളിലേക്ക് തുറക്കപ്പെടുന്ന വാതിലുകാകുന്നു 
എണ്ണി തുടങ്ങുന്ന കലണ്ടറിലെ അക്കങ്ങളാകുന്നു . 

അടുത്ത അവധിക്കു പോകുമ്പോള്‍ 
അടുത്ത അവധിക്കു വരുമ്പോള്‍ 
അടുത്ത അവധിക്ക് എന്തായാലും .. 
ഇങ്ങനെ കണക്കു കൂട്ടലുകള്‍ . ഗുണന ഹരണങ്ങള്‍ . കൂട്ടലുകള്‍ കിഴിക്കലുകള്‍ .

എന്നെങ്കിലും ഒരിക്കല്‍ ഒരു 'ഖുറൂജ് നിഹായി  ' തനിക്കും ഉണ്ടാകും എന്ന് ആശ്വസിക്കുന്നു . 

പക്ഷേ തിരികെ പ്രവേശനമില്ലാത്ത 
റീ  എന്ട്രി യില്ലാത്ത 
ടിക്കറ്റോ 
പാസ്സ്പോര്‍ട്ടോ
കസ് റ്റംസ് ക്ലിയറന്‍സോ
പെട്ടി കെട്ടലോ 
കഫീലിന്റെ സമ്മതമോ 
ഒന്നും ആവശ്യമില്ലാത്ത ഒരു ആജീവനാത്ത അവധി 
വരാനിരിക്കുന്നു .

അങ്ങോട്ടുള്ള ഓരോരുത്തരുടെയും ടിക്കറ്റ് നേരത്തെ തന്നെ 
ഓക്കേ ആണ് . പക്ഷേ , അത് ഒരു രഹസ്യമാണ് . 
ആ പാസ്സ് വേര്‍ഡ് ഒരേ ഒരാള്‍ക്കേ അറിയൂ 

ആ ദിവസം അടുത്താല്‍ പിന്നെ ഒരു നിമിഷം പോലും വൈകില്ല 
പോകുകയേ വഴിയുള്ളൂ ..

അതാണ്‌ ഒടുക്കത്തെ ഖുറൂജ് നിഹായി . ഫൈനല്‍ എക്സിറ്റ് 

ഈ അവധിയും മറ്റെല്ലാ അവധിയും തമ്മിലൊരു വലിയ വ്യത്യാസമുണ്ട് . 

എല്ലാ അവധിയെയും നാം കാത്തിരിക്കുന്നു . 
പക്ഷേ ആ അവധിയെ നാം കാത്തിരിക്കുന്നില്ല . 
സ്വപ്നത്തില്‍ പോലും കടന്നു വരുന്നില്ല . 
എന്ന് മാത്രമല്ല ഓര്‍ക്കാന്‍ തന്നെ ഇഷ്ടപ്പെടുന്നില്ല . 

ചിന്തിക്കാന്‍ ഇഷ്ടപ്പെടാത്തതും 
എല്ലാ നേരത്തും ചിന്തിക്കേണ്ടതുമായ ആ അവധിയാണ് 
ഈ ലോകത്ത് നിന്ന് മറ്റൊരു ലോകത്തേക്കുള്ള 
ഫൈനല്‍ എക്സിറ്റ് . 

അത് എന്ന്, എപ്പോള്‍, എവിടെ, ഏതു ഭൂവില്‍, ആകാശത്തോ കടലിലോ കരയിലോ കാറിലോ ട്രെയിനിലോ ഏറ്റവും സുരക്ഷിതമെന്ന് കരുതി ഒളിച്ചിരിക്കുന്ന സ്വന്തം താവളത്തിലോ
ഒക്കെ ആവാം . 

അവധി എത്തിയാല്‍ ഒരു നിമിഷം പോലും പിന്നെ താമസമില്ല 

എല്ലാ അവധിയെയും നാം കാത്തിരിക്കുന്നു 
ഒരേ ഒരു അവധി നമ്മെയും കാത്തിരിക്കുന്നു  !!!

പാഥേയം ഒരുക്കി വെച്ചോളൂ 
ഞാനിതാ പിറകില്‍ തന്നെയുണ്ട്‌ 
എന്ന് സ്വന്തം മരണം (ഒപ്പ് )