2014, മാർച്ച് 14, വെള്ളിയാഴ്‌ച

സൌന്ദര്യം ഇരിക്കുന്നത്




ഡോക്ടറെ കാണാന്‍ ഊഴവും കാത്തിരിക്കുമ്പോള്‍ ഞങ്ങള്‍ക്ക്
അഭിമുഖമായി ഇരിക്കുന്നുണ്ട്‌ ഒരു പെണ്‍കുട്ടിയും
അവളുടെ ഭര്‍ത്താവും ഒരു കൊച്ചു വാവയും .

അവള്‍ സുന്ദരിയാണ് .
കാണാന്‍ ചേലുള്ള ചിരിയും ഭാവങ്ങളും
അവള്‍ കിലുകിലെ സംസാരിക്കുന്നുണ്ട് . അവന്റെ തോളിലേക്ക് ചാഞ്ഞു കിടന്ന് വില കൂടിയ മൊബൈലില്‍ കളിക്കുകയാണ് അവള്‍ .

ഇടയ്ക്കിടെ കുട്ടിയുടെ വിവിധ ആങ്കിളിലുള്ള ഫോട്ടോസ്
എടുക്കുന്നുമുണ്ട് .
പരിസരം പോലും മറന്നു അവര്‍ അവരുടെ ലോകത്താണ് .

അവന്‍ ഒരു കരുമാടിക്കുട്ടന്‍ .
കറുത്ത നിറം . തടിച്ച കറ പിടിച്ച ചുണ്ടുകള്‍ . ഉന്തിയ പല്ലുകള്‍ .
രണ്ടു പേരെയും കാണുന്ന ആരും അറിയാതെ പറഞ്ഞു പോകും .

'അയ്യേ ഈ സുന്ദരിക്കുട്ടിക്ക് കിട്ടിയ ചെക്കനാണല്ലോ ഇവന്‍ ."

സത്യം പറയാമല്ലോ എനിക്കും അങ്ങനെ തോന്നി . അന്നേരം എന്റെ മനസ്സില്‍ 'വടക്ക് നോക്കി യന്ത്ര'ത്തിലെ 'നിലവിളക്കും കരിവിളക്കും '
- ശ്രീനിവാസനും പാര്‍വതിയും - ഒരു നേര്‍ത്ത ചിരിയോടെ ഓര്‍മ്മയിലെത്തുകയും ചെയ്തു .

പക്ഷേ എന്നെ ഏറെ അത്ഭുതപ്പെടുത്തിയത് ആ പെണ്‍കുട്ടിയുടെ സമീപനവും ഭാവഹാവാദികളും ആണ് . ആ മുഖത്തു സന്തോഷം മാത്രമാണ് ഓളമിടുന്നത് . സംസാരത്തിലും പെരുമാറ്റ ത്തിലും അവള്‍ ഉല്ലാസവതിയും സന്തുഷ്ടയും ആണ് . അവര്‍ പരസ്പരം ഏറെ സ്നേഹിക്കുന്നുണ്ട് എന്ന് ആര്‍ക്കും വായിച്ചെടുക്കാം ആ സമീപനങ്ങളില്‍ നിന്ന് .

എനിക്ക് വല്ലാത്ത സന്തോഷം തോന്നി അവരെ കണ്ടപ്പോള്‍ .

അന്നേരം പഴയ ഒരു സംഭവ കഥ എന്റെ മനസ്സില്‍ ഓടിയെത്തി .

ശുക്കൂര്‍ സുന്ദരനായിരുന്നു .
ആര് കണ്ടാലും ഒന്ന് നോക്കിപ്പോവുന്ന നല്ല ചൊറുക്കുള്ള പയ്യന്‍ .
ഉയര്‍ന്ന വിദ്യാഭ്യാസവും ജോലിയുമൊക്കെയുണ്ട് അവന് .

അവന്റെ കല്യാണത്തിന്റെ അന്ന് പുതു പെണ്ണ് വരുന്നതും കാത്തു സുഹൃത്തുക്കള്‍ പന്തലിന്റെ പുറത്തു കാത്തിരിക്കുകയാണ് .

എല്ലാവരുടെയും മനസ്സിലുണ്ട് അവളെ ക്കുറിച്ച് ഒരു സങ്കല്പം .
ഷുക്കൂറിന്റെ ഭാര്യയല്ലേ നല്ല സുന്ദരിക്കുട്ടിയായിരിക്കും .
അവന്റെ സെലക്ഷന്‍ മോശമാവാന്‍ വഴിയില്ല .

ഒടുവില്‍ പുതുമണവാട്ടി എത്തി .
വരനും വധുവും പന്തലില്‍ ഇരുന്നു .
രണ്ടു പേരെയും ഒന്നിച്ചു കണ്ടവര്‍ കണ്ടവര്‍ മൂക്കത്തു വിരല്‍ വെച്ചു .
പലരും കുശുകുശുത്തു .

സുഹൃത്തുക്കള്‍ അടക്കം പറഞ്ഞു : അയ്യേ .. !!!

വിവാഹം കഴിഞ്ഞു ഒന്ന് രണ്ടു ദിവസത്തിനു ശേഷമാണ്
സുഹൃത്തുക്കളുടെ അടുത്തേക്ക്‌ ശുക്കൂര്‍ വരുന്നത് .
എല്ലാവരുടെ മുഖത്തും വല്ലാത്തെ ഒരു മ്ലാനത .

ശുക്കൂര്‍ നല്ല ഹാപ്പിയിലാണ് !
അവന്‍ കൂട്ടുകാരോട് ചോദിച്ചു :
എന്ത് പറ്റി ? ഒരു മൂഡ്‌ ഇല്ലാത്ത പോലെ ..

ആരും ഒന്നും പറയുന്നില്ല . ഒടുവില്‍ കൂട്ടത്തില്‍ എല്ലാം തുറന്നു പറയാറുള്ള 'കുഞ്ഞാപ്പുട്ടി ' ഷുക്കൂ റിനോട് പറഞ്ഞു :

"എടാ പൊട്ടാ അനക്ക് ആ കറുപ്പത്തിയെ എങ്ങനെ ഇഷ്ടപ്പെട്ടു ...?
നീ അവളെ കണ്ടിട്ട് തന്നെയാണോ കെട്ടിയത് ?

ശുക്കൂര്‍ ചിരിച്ചു കൊണ്ട് പറഞ്ഞു :

''എടാ കുഞ്ഞാപ്പുട്ട്യെ ന്റെ കണ്ണ് എങ്ങാനും അന്റെ മോത്ത്‌ ആണെങ്കില്‍ ഉണ്ടല്ലോ... !!!

പുറത്തല്ല സൌന്ദര്യം അകത്താണ്
കണ്ണിലല്ല സൌന്ദര്യം മനസ്സിലാണ്
നമ്മുടെ സൌന്ദര്യ ബോധം അല്ല മറ്റുള്ളവരുടെത്
നമ്മുടെ കാഴ്ച അല്ല മറ്റുള്ളവരുടെത്
കാഴ്ച നന്നാവുമ്പോള്‍ കാഴ്ചപ്പാടും നന്നാവുന്നു

വ്യത്യസ്തമായ കാഴ്ചയും കാഴ്ചപ്പാടും ഉണ്ടായതു കൊണ്ടാവണം
ഈ ലോകം ഇങ്ങനെ നിലനില്‍ക്കുന്നത്

എല്ലാവരുടെയും സൌന്ദര്യ സങ്കല്പം ഒന്നായിരുന്നു എങ്കില്‍
ഈ ലോകവും അതിലുള്ള മനുഷ്യരും ഭാര്യാ ഭര്‍തൃ ബന്ധം പോലും
ഇങ്ങനെ ആവുമായിരുന്നില്ല .. !!

സ്നേഹത്തിന്റെ കണ്ണുകള്‍ക്ക്‌ അപാകത പോലും
ഹൃദ്യമായി തോന്നും
വെറുപ്പിന്റെ കണ്ണുകള്‍ക്ക്‌ ഭംഗി പോലും
അഭംഗിയായി അനുഭവപ്പെടും

എല്ലാ ദമ്പതികള്‍ക്കും പരസ്പരം സ്നേഹിക്കാനും
നമുക്ക് കിട്ടിയ പങ്കാളിയുടെ സൌന്ദര്യം
ആസ്വദിക്കാനും അതില്‍ സംതൃപ്തി കണ്ടെത്തി
സന്തുഷ്ട ജീവിതം നയിക്കാനും കഴിയട്ടെ .

അറിയുക :
''നമുക്ക് നാമേ പണിവതു നാകം
നരകവുമതുപോലെ !!

ഒരു വാക്ക് കൂടി :

മറ്റുള്ളവര്‍ക്ക് എന്ത് തോന്നുന്നു എന്നല്ല നമുക്ക് നമ്മെക്കുറിച്ചു എന്ത് തോന്നുന്നു എന്നതാണ് പ്രധാനം .

5 comment drops:

പ്രിയ വായനക്കാരേ,കമന്റ്‌ ബോക്സിന്റെ താഴെ കൊടുത്തിരിക്കുന്ന

'ഇമെയില്‍ വഴി സബ്സ്ക്രൈബ് ചെയ്യുക'

എന്നതില്‍ ക്ലിക്ക് ചെയ്‌താല്‍ താങ്കളുടെ കമന്റിനു മറുപടി

ഇ മെയില്‍ ആയി ലഭിക്കും

  1. മനസ്സിലുള്ള സൗന്ദര്യം അത് എന്നും നിലനില്‍ക്കും...

    മറുപടിഇല്ലാതാക്കൂ
  2. മറ്റുള്ളവരുടെ കുറവുകള്‍ ചൂണ്ടിക്കാണിക്കാന്‍ വ്യഗ്രതയുള്ളവരാണ് കൂടുതലും....
    ആശംസകള്‍ മാഷെ

    മറുപടിഇല്ലാതാക്കൂ
  3. തീർച്ചയായും മനപ്പൊരുത്തം അതിനേക്കാൾ വലിയ സൌന്ദര്യം ഉണ്ടോ

    മറുപടിഇല്ലാതാക്കൂ
  4. നമിക്കിലുയരാം,നടുകിൽത്തിന്നാം, നൽകുകിൽ നേടീടാം
    നമുക്കു നാമേ പണിവതു നാകം, നരകവുമതുപോലെ...

    മറുപടിഇല്ലാതാക്കൂ

 
Copyright © 2010 Iringattiri Drops. All rights reserved.
Design By- മലയാളം ബ്ലോഗ്‌ ഹെല്‍പ്