കത്തുകള്‍

കിട്ടാത്ത കത്തുകള്‍

തണുത്ത പ്രഭാതത്തിലെ
തല വഴി മൂടിയ പുതപ്പ്
നിലംപതിപ്പുഴ
തെങ്ങോല ത്തലപ്പിലെ വെയില്‍ കിളി
വീട്ടിക്കുന്നിറങ്ങി കറങ്ങി വരുന്ന
മാമ്പൂ മണക്കും വികൃതിക്കുളിര്‍
കാക്കക്കോത്തേറ്റ
കിളിച്ചുണ്ടന്‍
മഞ്ഞു ചുണ്ടിലെ മൈലാഞ്ചി ചെടി
കൂമ്പന്‍ മല മുത്തി പറയന്മാടും കടന്ന്
പാണന്ചോല യില്‍ അലക്കിക്കുളി ച്ച് ഈറന്‍ മാറി വന്ന്
കെട്ടിപ്പിടിച്ചൊരുമ്മ തന്നോടി പോവുന്ന മഴത്തുള്ളി.

കിട്ടിയ കത്തുകള്‍

കടല്ക്കൊതി.
തീരം തിന്നു പിന്നെയും മുന്നോട്ടു കുതിക്കുന്ന ഭ്രാന്തി ത്തിര
കനല്‍ വയലില്‍
നിഴലില്ലാ പൊത്തില്‍ അടയിരിക്കും
തീപക്ഷി.
നടന്നു പോന്ന കാല്‍ പടങ്ങള്‍
കരുണയില്ലാതെ മായ്ച്ചു കളയുന്ന പൊടിക്കാറ്റ്.
പക്ഷേ ഒന്നുണ്ട്;
കിട്ടാക്കത്തിലെ ഇല്ല വരികളിലും
കിട്ടിയ കത്തിലെ ഇല്ലായ്മകളിലും
ഒരു പക്ഷി മണം
പതിയിരിപ്പുണ്ട്