കഥ - മോണിംഗ് വാക്ക്

നരച്ച മനസ്സ് എടുക്കാതെ വാര്‍ധക്യം നടക്കാനിറങ്ങുമ്പോള്‍ മൂടിപ്പുതച്ചുറങ്ങുന്ന യൌവ്വനത്തോട്‌ ചോദിച്ചു;
വരുന്നോ, കൂടെ? ദുഖിക്കേണ്ടിവരില്ല പിന്നെ..
അന്നേരം , യൌവ്വനം ചന്തി ചൊരിഞ്ഞു, തുടയിടുക്കില്‍ കൈതിരുകി, തിരിഞ്ഞു കിടന്നു..

കഥ - നിശാപ്രയാണം

'എനിക്കൊന്നു വെളിക്കിരിക്കണം..'

'രാത്രിയിലെ ഈ പരിപാടി ഒന്ന് നിര്‍ത്തിക്കൂടെ നിനക്ക്..'?

അകത്തൊന്നുണ്ടാക്കാന്‍ എത്ര കാലമായി പറയുന്നു,കേള്‍ക്കണ്ടേ..'

'നടക്ക്..'

അയാള്‍ ടോര്‍ച്ചുമായി പിറകെച്ചെന്നു.

'നിങ്ങളിവിടെ ഇരുന്നാല്‍ മതി..'

അയാള്‍ മൂളിപ്പാട്ടും പാടി കാവലിരുന്നു..

എല്ലാം കഴിഞ്ഞ് അവര്‍ വീട്ടിലേക്കു കയറി വാതിലടച്ചു.

അപ്പോഴുണ്ട് എരിയുന്ന ഒരു ബീഡിക്കുറ്റി നടന്നു പോവുന്നു; പൂച്ചയെപ്പോലെ..!

കഥ - ലളിത ഗാനം

രാത്രിയില്‍ കിടപ്പറയില്‍ ഇടതൂര്‍ന്ന മുടിയിഴകളില്‍ തഴുകിത്തലോടി അവന്‍ അവളോട് പറഞ്ഞു:
എന്തൊരഴക്.. എന്ത് മിനുപ്പ്‌.. എന്തൊരു ഉന്മത്ത ഗന്ധം..!
പിറ്റേന്ന് ഉച്ചക്ക്, വറ്റുകള്‍ക്കിടയില്‍ നിന്ന് ഒരു മുടി നാരിഴ വിരലിലുടക്കിയപ്പോള്‍, അവന്‍ പൊട്ടിത്തെറിച്ചു :
'എന്തായിത്..'?
അവള്‍ വളരെ ശാന്തയായി, മുടിയിഴ കൈ വെള്ളയിലെടുത്തു ഓമനിച്ചു
ഈണത്തില്‍ ഇങ്ങിനെ പാടി:
എന്തൊരഴക്.. എന്ത് മിനുപ്പ്‌.. എന്തൊരുന്മത്ത ഗന്ധം..!