പിണങ്ങിപ്പോയതിന്റെ പിറ്റേന്ന്

വെന്തു തുടങ്ങിയ

രണ്ടു വറ്റുകളെടുത്തു

കൈ വെള്ളയില്‍ വെച്ചപ്പോള്‍

മുഖം വെട്ടിച്ച്

കലത്തിലേക്ക് തന്നെ

അവ പിണങ്ങിപ്പോയി.

തിളച്ചു തൂവിയ

വാക്കിന്റെ വക്കില്‍ നിന്ന്

വേവിറക്കി വെക്കുമ്പോള്‍

വിരല്‍ ചുണ്ടുകളില്‍

പൊള്ളല്‍ക്കുത്തേറ്റു .

ചുട്ടു നീറിയ കൈ കുടഞ്ഞ്‌

ഇത്തിരി തണുപ്പ് പരതുമ്പോള്‍

ഹോര്‍ലിക്സ്

കുപ്പികള്‍ക്കിടയില്‍ മറഞ്ഞിരുന്ന്

തേന്‍ കുപ്പി കണ്ണിറുക്കി കാണിച്ചു.

'മിണ്ടരുത്..'

കറിക്കരിയുമ്പോള്‍ 

പൊള്ളിയ വിരല്‍ പള്ളയില്‍ തന്നെ

കത്തി തട്ടിയപ്പോള്‍ 

അടുക്കളക്കോണില്‍

പേടിച്ചരണ്ട്,

പതുങ്ങിക്കിടന്ന വളപ്പൊട്ട്‌ ചോദിച്ചു:

'വല്ലാതെ നൊന്തോ..'?