2014, ജൂൺ 24, ചൊവ്വാഴ്ച

അന്നേരം അമ്മ വന്നു നെറ്റിയില്‍ തൊട്ടു



അന്നേരം അമ്മ വന്നു നെറ്റിയില്‍ തൊട്ടു
'അയ്യോ ന്റെ കുട്ടിക്ക് വല്ലാതെ പനിക്കുന്നല്ലോ ന്റെ ദൈവേ ..
എന്ന് ആധിയോടെ പറഞ്ഞു സാരിത്തലപ്പ്‌ കൊണ്ട് മുഖം തുടച്ചു . അത് നന്നായി ആസ്വദിച്ചു കണ്ണുകളിറുകെ ചിമ്മി വാട്ടിയ വാഴയില പോലെ ഞാന്‍ കിടന്നു .

തുമ്മാന്‍ മുട്ടിയ ഒരു ആവേശം വെറുതെ ഒന്ന് വന്നു പെട്ടെന്ന് നശിച്ച് ചിന്നിച്ചിതറി അമ്പേ പരാജയപ്പെട്ടു വന്നതിലേറെ വേഗത്തില്‍ തിരിച്ചു പോയി .

അമ്മയുടെ കൈകള്‍ എടുത്തു ഹൃദയത്തോട് ചേര്‍ത്തു വെച്ചു . അന്നേരം ആ വിരല്‍ത്തലപ്പുകളിലൂടെ പേരറിയാത്ത ചില അനുദൈര്‍ ഘ്യ തരംഗങ്ങള്‍ ഉള്ളിലെവിടെയൊക്കെയോ തിരയടിച്ചു .

അല്പം കഴിഞ്ഞപ്പോള്‍ ഒരു കടും പിഞ്ഞാണത്തില്‍ കുറിയരിക്കഞ്ഞിയും ചുട്ട പപ്പടവും നാരങ്ങാ അച്ചാറുമായി അമ്മ വരുന്നത് കണ്ടു . ആ നിമിഷം അടഞ്ഞു പോയ നാസാ ദ്വാരങ്ങള്‍ പെട്ടെന്ന് ഉന്മേഷ ഭരിതരായി . ഞാന്‍ കൈകുത്തി എണീറ്റിരുന്നു .

അമ്മ കോരിത്തരുന്ന പൊടിയരി ക്ക ഞ്ഞി കുടിക്കുന്ന നേരത്ത്
സ്നേഹത്തിന്റെ കയില്‍ വായിലേക്ക് കൊണ്ടു വരുമ്പോള്‍
ഞാന്‍ ആ കൈകളിലൊന്ന് കേറിപ്പിടിച്ചു .
ആ പിടുത്തം ചുട്ടു പൊള്ളുന്ന പനിയെ വിരട്ടി ഓടിക്കാന്‍ വൃഥാ ഒരു ശ്രമം നടത്തി .

''ഇനി പുതച്ചു മൂടി കിടന്നോ . ഇപ്പൊ പനി മാറും കേട്ടോ കുട്ടാ .. ''
എന്നും പറഞ്ഞു പുതപ്പു മീതേക്കൂടി ഇട്ടു തന്നു അമ്മ .

എന്നിട്ട് അമ്മ ദേ ഇപ്പൊ വരാം എന്ന് പറഞ്ഞു അടുക്കളയിലേക്കു പോകുന്നത് കണ്ടു .

പനി വല്ലാതെ പോള്ളിച്ചപ്പോള്‍ പിച്ചും പേയും പറയുന്നത് കേട്ടിട്ടാവണം ഉറക്കം മുറിഞ്ഞ ദേഷ്യത്തില്‍ അടുത്ത ബെഡ് ലെ കുഞ്ഞിക്കോയ 'ഒന്ന് ഒറ ങ്ങാനും അയക്കൂല ഈ പണ്ടാരം ' എന്ന് പിരാകിപ്പറഞ്ഞു ചന്തി ചൊറിഞ്ഞു തിരിഞ്ഞു കിടക്കുമ്പോഴാണ് കണ്ണുകള്‍ തുറന്നത് . അപ്പോഴും വല്ലാത്ത ഒരു ശബ്ദത്തോടെ എ സി മൂളുന്നുണ്ടായിരുന്നു .

0 comments:

ഒരു അഭിപ്രായം പോസ്റ്റ് ചെയ്യൂ

 
Copyright © 2010 Iringattiri Drops. All rights reserved.
Design By- മലയാളം ബ്ലോഗ്‌ ഹെല്‍പ്