പ്രതിധ്വനി

< ദൈവം ഉണ്ടെന്നു തെളിഞ്ഞു. മാധ്യമങ്ങള്‍ ഇനിയെങ്കിലും പ്രതികരിക്കാന്‍ കഴിയാത്തവരെ കെട്ടിയിട്ടു നടത്തുന്ന 

വിമര്‍ശം നിര്‍ത്തണം > 

- ടോമിന്‍ തച്ചങ്കരി 

@ പലരും അങ്ങനെയാണ്. സ്വയം രക്ഷപ്പെടുമ്പോള്‍ പറയും : ദൈവം ഉണ്ടെന്ന്.

< എഴുതിയില്ലെങ്കില്‍ മരിച്ചു പോകും എന്നൊന്നും തോന്നിയിട്ടില്ല > 

- അഷ്ടമൂര്‍ത്തി 

@ ചിലര്‍ എഴുതിയാലാണ് മരിച്ചു പോകുക , എഴുത്തുകാര്‍ അല്ല ; വായനക്കാര്‍ 

< മുഖ്യ ധാര പ്രസ്ഥാനത്തില്‍ നിന്ന് കൊണ്ട് സര്‍വതന്ത്ര സ്വതന്ത്രനെ പോലെ പൊതുതാത്പര്യം പറയാന്‍ 

ബുദ്ധിമുട്ടാണ് . മറ്റേതെങ്കിലും പാര്‍ട്ടി യിലായിരുന്നു എങ്കില്‍ ഞാന്‍ പണ്ടേ പുറത്താകുമായിരുന്നു > 

- വി.എം.സുധീരന്‍

@ അളമുട്ടിയാല്‍ കൊണ്ഗ്രസ്സും കടിക്കും 

< ഉമ്മന്‍ ചാണ്ടിയും വി.എസും നല്ല ടീമാണ്. അങ്ങോട്ടുമിങ്ങോട്ടും മത്സരിച്ചു മുന്നേറാന്‍ പറ്റും . ഇത് രണ്ടു 

കൂട്ടര്‍ക്കും ഗുണം ചെയ്യും.. തങ്ങള്‍ മെച്ചപ്പെട്ടത് മറുപക്ഷം കാരണമാണ് എന്ന് അവരറിയുന്നില്ല എന്നേയുള്ളൂ... > 

- ഫിലിപ്പോസ് മാര്‍ ക്രിസോസ്റ്റം 

@ ഇവര്‍ ചെയ്യുന്നത് എന്താണെന്ന് ഇവര്‍ അറിയുന്നില്ല . ഇവരോട് പൊറുക്കേണമേ ...

<ദുരിതമനുഭവിക്കുന്ന വരോട് മുഖ്യ മന്ത്രി ആശ്വാസ വാക്ക് പറയുമ്പോള്‍ വില്ലേജ് ഓഫീസര്‍ ചെയ്യേണ്ട പണിയാണ് 

ഉമ്മന്‍ ചാണ്ടി ചെയ്യുന്നതെന്ന് കോടിയേരി പരിഹസിച്ചു. ഇ.കെ. നായനാരും എ.കെ.ആന്റണിയും വി.എസും 

മുഖ്യമന്ത്രി മാരായിരുന്നപ്പോള്‍ വില്ലേജ് ഓഫീസര്‍മാരും ഉദ്യോഗസ്ഥരും കൃത്യമായി ജോലി ചെയ്തിരുന്നെങ്കില്‍ 

ആളുകള്‍ക്ക് പരാതിയുമായി ജന സമ്പര്‍ക്ക പരിപാടിക്ക് പോകേണ്ടിയിരുന്നില്ല > 

- ബി.ആര്‍.പി. ഭാസ്ക്കര്‍

@ ജനതര്‍ക്ക പരിപാടിക്കൊക്കുമോ ജന സമ്പര്‍ക്ക പരിപാടി ?

< വിയറ്റ്നാമിനെപ്പറ്റി ഇന്നും കവിതയെഴുതുന്ന എഴുത്തുകാരും ബുദ്ധിജീവികളും ഇന്ത്യ യുടെ വിവിധ ഭാഗങ്ങളില്‍ 

നടക്കുന്ന വര്‍ഗീയ ഫാസിസം കാണാതെ പോകുകയാണ് .. അവര്‍ ഗുരുതരമായ മൌനം പാലിക്കുകയാണ് > 

- എന്‍.എസ്. മാധവന്‍ 

@ കഥയും എഴുതാമല്ലോ.. കവികളെ ഏല്‍പ്പിച്ചു കഥാകാരന്മാര്‍ എവിടെ പോകുന്നു?

< ഞാന്‍ മുഖ്യ മന്ത്രി ആയാല്‍ ഒറ്റ റോഡും പുതുതായി ഉണ്ടാക്കില്ല . റോഡ്‌ നന്നാക്കലാണ്‌ വികസനം എന്ന് 

കരുതുന്നവരുണ്ട്.. പക്ഷെ ഉള്ള റോഡുകള്‍ ലിങ്ക് ചെയ്തു ഗതാഗതക്കുരുക്ക് പരിഹരിക്കുകയാണ് വേണ്ടത് എന്ന് 

എനിക്കറിയാം.> 

- സന്തോഷ്‌ പണ്ടിട്റ്റ് 

@ 'ലിങ്ക്' ആണല്ലോ പണ്ടിട്റ്റ് നെ സൃഷ്ടിച്ചത്.. മുഖ്യ മന്ത്രി ആയാല്‍ എല്ലാ വകുപ്പും ഞാന്‍ തന്നെ 

കൈകാര്യം ചെയ്തോളും എന്ന് പറഞ്ഞില്ലല്ലോ ഭാഗ്യം ..!!!

<നൂറു ദിവസം ഓടുന്ന സിനിമ ഉണ്ടാക്കിയിട്ട് കാര്യമില്ല എന്ന് എനിക്ക് തോന്നിത്തുടങ്ങിയിരിക്കുന്നു . നൂറു ദിവസം 

കഴിഞ്ഞും ചര്‍ച്ച ചെയ്യപ്പെടേണ്ട സിനിമകളാണ് ഞാന്‍ ഇപ്പോള്‍ ആഗ്രഹിക്കുന്നത് > 

- കമല്‍

@ ഇനി അങ്ങനെ പറയലാണ് നല്ലത്. നൂറു പോയിട്ട് ആറ് ദിവസം പോലും ഓടിക്കാന്‍ ഇപ്പോള്‍ പറ്റുന്നില്ല അല്ലെ?

- ചിത്രങ്ങള്‍ക്കും കാരിക്കെച്ചറുകള്‍ക്കും കടപ്പാട്