കുടുംബത്തിന്റെ ഇമ്പം

കുടുംബ ബന്ധങ്ങളിലും ഭാര്യാഭര്‍തൃ ജീവിതത്തിലും ഒരു പാട് ഗുണകരമായ
മാറ്റങ്ങള്‍ വന്നിട്ടുണ്ട് ഇന്ന് . ഭാര്യാ ഭര്‍ത്താക്കന്മാര്‍ ഒരേ സീറ്റിലിരുന്നു യാത്ര ചെയ്യുന്നതും ഒന്നിച്ചിരുന്നു ഭക്ഷണം കഴിക്കുന്നതും നാണക്കേടായി കണ്ടിരുന്ന ഒരു കാലമുണ്ടായിരുന്നു .
രാത്രി കിടപ്പറയില്‍ വെച്ച് മാത്രം പരസ്പരം കാണുകയും സംസാരിക്കുകയും ചെയ്തിരുന്ന
പണ്ടത്തെ ദമ്പതികളും ജീവിതം ഒന്നിച്ചാസ്വദിക്കുന്ന ഇന്നത്തെ ദമ്പതികളും തമ്മിലുള്ള മാറ്റം
എത്ര ആനന്ദകരമാണ് !

ഒന്നിച്ചു യാത്ര ചെയ്യുമ്പോള്‍ പുരുഷന്‍ കുഞ്ഞിനെ എടുക്കുന്നതും ഭാര്യയെ അടുക്കളയില്‍ സഹായിക്കുന്നതുമൊക്കെ 'പെണ്‍ കോന്തന്മാരുടെ ' ലക്ഷണമായി കണ്ടിരുന്ന ഒരു 'അന്ധ'കാലം കടന്ന് ഭാര്യയെ ഇണയായി , തുണയായി , സുഹൃത്തായി , ജീവിത പങ്കാളിയായി കാണുന്ന ഒരു ശുഭകരമായ അവസ്ഥയിലേക്ക് ഇന്ന് നാമെത്തിയിരിക്കുന്നു .

എന്നിട്ടും .. കുടുംബ വഴക്കുകള്‍ക്കും വഴി പിരിയലുകള്‍ക്കും ബന്ധം മുറിക്കലുകള്‍ക്കും
കുറവൊന്നും വന്നിട്ടില്ല . ആരെങ്കിലും ഒരാള്‍ ഒന്ന് തോറ്റു കൊടുത്താല്‍ തീരുമായിരുന്ന എത്രയെത്ര പ്രശ്നങ്ങളാണ് വഷളായി വഷളായി ഒടുവില്‍ ബന്ധം മുറിക്കല്‍ വരെ എത്തിപ്പെടുന്നത് ?

ഒന്ന് തോറ്റു കൊടുത്തു എന്ന് വിചാരിച്ചു ആര്‍ക്ക് എന്ത് നഷ്ടമാണ് വരാനുള്ളത് ?
തനിക്കു വേണ്ടി രാവും പകലും അദ്ധ്വാനിക്കുകയും തന്നെ സംരക്ഷിക്കുകയും ചെയ്യുന്ന
ഭര്‍ത്താവിന്റെ മുമ്പില്‍ ഒന്ന് തോല്ക്കാന്‍ മനസ് കാണിച്ചാല്‍ എന്ത് സംഭവിക്കാനാണ് ?
തന്റെ വീട് സംരക്ഷിക്കുകയും കുട്ടികളെ വളര്‍ത്തുകയും അടുക്കളയില്‍
അടുപ്പായി എരിയുകയും സഹശയനം നടത്തുകയും ചെയ്യുന്ന ഭാര്യക്ക് മുമ്പില്‍ ഭര്‍ത്താവ് തോറ്റു കൊടുത്താലെന്താ ആകാശം ഇടിഞ്ഞു വീഴുമോ ?

നമ്മുടെ ജീവിതത്തില്‍ നടക്കുന്നത് പ്രധാനമായും രണ്ടു കാര്യങ്ങളാണ് .
ഒന്ന് സംഭവങ്ങള്‍ മറ്റൊന്ന് സംഭവങ്ങളോടുള്ള പ്രതികരണങ്ങള്‍ . സംഭവങ്ങള്‍ എല്ലാം നമ്മുടെ പരിധിയിലല്ല . പക്ഷേ അവയോടുള്ള പ്രതികരണങ്ങള്‍ നമ്മുടെ വരുതിയില്‍ വരുന്നതാണ് .
ഈ പ്രതികരണത്തിനാണ് നാം പെരുമാറ്റം സ്വഭാവം എന്നൊക്കെ പറയുന്നത് .

ഓരോ മനുഷ്യരും ഓരോ മനുഷ്യരാണ് . ഒരാളും മറ്റൊരാളെ പോലെയല്ല . അത് കൊണ്ട് തന്നെ സ്വഭാവവും വ്യത്യസ്തമാണ് . ഒരേ മാതാപിതാക്കള്ക്ക് ജനിച്ച ഒരേ വീട്ടില് വളര്‍ന്ന കുട്ടികള്‍ പോലും രാവും പകലും പോലെ വ്യത്യാസമുള്ള സ്വഭാവക്കാരായി മാറുന്നത് നാം കാണുന്നുണ്ട് .

നമ്മെ നാം തിരിച്ചറിയുകയും നമ്മെ നാം തന്നെ മാറ്റാന്‍ ശ്രമിക്കുയും ചെയ്താലേ സംതൃപ്തമായ കുടുംബ ജീവിതം മാത്രമല്ല സുഖകരമായ മറ്റു ബന്ധങ്ങളും നില നിര്‍ത്താനും പരസ്പര സ്നേഹത്തോടെയും സൌഹാര്‍ദ്ദ ത്തോടെയും മുന്നോട്ടു കൊണ്ട് പോകാനും കഴിയൂ

പിന്‍ മൊഴി :
ഭാര്യാ ഭര്‍തൃ ബന്ധത്തിന്റെ അടിസ്ഥാന ശില മാനസിക ബന്ധം ആണ്
മാനസിക ബന്ധത്തിന്റെത് ശാരീരിക ബന്ധവും ..!!!